Avtomobillər ucuzlaşdı, bəs hissələri?
Azərbaycanın avtomobil bazarında son dövrlər durğunluq müşahidə olunur. Bu ilin fevral ayında Azərbaycan manatı devalvasiyaya uğradıqdan sonra ikinci əl avtomobillərin də qiymətləri xeyli aşağı düşüb. Mənzil bazarında olduğu kimi, maşın bazarında da hər kəs gözləmə mövqeyini seçib. Əvvəlki kimi alqı-satqı yoxdur. Satanlar alıcı qıtlığı ilə üzləşdikləri üçün qiymətləri aşağı salmaq məcburiyyətində qalıblar.
Bu durğunluq avtomobil təmiri sektoruna da təsirsiz ötüşməyib. Apardığımız müşahidələr göstərir ki, artıq avtomobil təmiri ilə məşğul olan servislər və fərdi ustalar da müştəri qıtlığından əziyyət çəkirlər.
Məntiqlə belə bir durğunluq ehtiyat hissələri bazarına da sirayət etməli idi. Ancaq nədənsə ehtiyat hissələrinin qiymətləri nəinki aşağı düşməyib, hətta bəzi hallarda yüksəlib.
İqtisadçı ekspert Vüqar Bayramov belə bir vəziyyəti normal hesab edir. O, bildirib ki, ikinci əl ehtiyat hissələri bazarında qiymət azalması müşahidə olunur. Ancaq təzə ehtiyat hissələrinin qiymətinin aşağı düşməməsi dünya bazarı ilə əlaqədardır.
"Azərbaycan vətəndaşlarının yığıma üstünlük verməsi və avtomobil kreditlərinin şərtlərinin ağırlaşması avtomobil bazarında tələbin kəskin azalmasına səbəb olub. Amma dünya bazarında nə təzə avtomobillərin, nə də ki, təzə ehtiyat hissələrinin qiymətləri aşağı düşməyib. Hətta ölkəmizdə də təzə avtomobillərin qiymətlərinin manat ifadəsində artım var", - deyə o əlavə edib./Milli.az
