Avtomobildən çıxan ağ və qara tüstü nəyin əlamətidir?

İxrac borusundan çıxan tüstünün rəngi avtomobilin nasazlığından və ya digər məqamlardan xəbərdarlıq rolunu oynayır.
Tüstü adətən yanacağın tam və ya düzgün yanmamamğı səbəbindən və ya soyuducu mayenin, yağın silindrə düşməsindən əmələ gəlir.
İxrac borusundan çıxan ağ tüstü- əslində soyuq mühərrikin qızma rejimi üçün normal haldır. Ancaq, unutmayaq ki, bu tüstü yox, buxardır. Buxar halında su ixrac sistemində yüksək nəmliyin əlamətidir. Qızdırılma anında ixrac sistemindəki su buxarlanır və bəzən rütubət kondensasiya edir və su şəklində ixrac borusundan süzülür. Sistem qızandan və rütubət aradan qalxdıqdan sonra tüstülənmə dayanır.

Bir məqamı da nəzərə almaq lazımdır ki, -10 dərəcədə də ağ buxar yaranır, mənfi 20-25 dərəcə selsidə isə buxar daha qatı,ağ rəng alır. Ətraf mühitdə rütubət nə qədər çox olarsa bu buxarın qatılığı daha da artır. Bəzən isə ağ tüstü "qızdırılmış" avtomobillərdə də adi vaxtda görünür.Bun səbəb soyuducu məhlulun silindirdə qalması, sızması ola bilər. Soyuducu məhluldakı su yanacağın yanması zamanı tam buxarlana bilmir və ağ buxar əmələ gətirir.

Ağ tüstü daim müşahidə edilərsə bu zaman səbəbi tapmaq lazımdır. Əsasən də mühərrikin həddən artıq qızması ilə baş verən bu hadisəyə səbəb soyutma sisteminin - termostatın, ventilyatorun işə düşmə datçikinin,ventilyatorun düzgün işləməməsi, radiatorun hermetik olmaması, rezin borular və ya onların birləşmələri səbəb ola bilər. Belə hal müşahidə edildikdə mütləq avtomobili usta yanına aparmaq lazımdır. Sonra bu nasazlığın fəsadları daha pis ola bilər.

Qara tüstü isə hava-yanacaq kütləsinin həddindən artıq zənginləşməsindən yaranır və enerji sisteminin, yanma sisteminin və yanacaq püsgürmə sisteminin nasazlığından baş verir. Bu halda yanacağın daha çox istifadəsi hiss edilir, avtomobili işə salma problemli olur, mühərrik səlis işləmir, ixrac borusundan kəskin iyli qaz çıxır və mühərrikin gücünün itməsi halları ilə müşayət edilir. Benzin mühərrikli avtomobillərdə qara tüstü adətən müxtəlif datçiklərin nasazlığından, forsunkanın hermetik olmamasından yaranır. Forsunka ilə yaranan problem isə daha qorxuludur. Belə ki,işləməyən mühərrikin nasaz forsunkasından silindrə çoxlu yanacaq axa bilər və bu da öz növbəsində porşenin yuxarı son nöqtəyə qədər qalxmasına mane ola bilər.