"Apple" biometrik ötürücülərə sahib "AirPods" üzərində çalışır

"AirPods" ən yaxşı naqilsiz qulaqlıqdır. Lakin "Apple" şirkəti bu qulaqlıq modelini artıq 2 ildir ki, yeniləmir. Lakin şirkətin artıq yeni model "AirPods" üzərində çalışdığı məlumdur. Bugün isə şirkətin yeni model "AirPods" ilə bağlı patent məlumatı ortaya çıxıb. Şirkətin patent sorğusundə əks olunmuş məlumatlara əsasən, yeni "AirPods" modelində insan sağlamlığını və qulaqlığın hansı qulağa taxıldığını təyin edəcək ötürücülər yerləşdiriləcək.

"9to5Mac" saytının verdiyi məlumata görə, növbəti "AirPods" modeli simmetrik konstruksiyaya sahib olacaq. Beləliklə, qulaqlıqların hər bir tayını sol qulağa ya da sağ qulağa taxmaq mümkün olacaq. Bundan əlavə, patentdə qeyd olunub ki, taxıldığı qulaqdan asılı olaraq onların iş rejimlərinin dəyişdirilməsinə imkan verəcək ötürücülər və mikrosxemlər də yeni qulaqlıqların özəllikləri arasında olacaq. Biometrik ötürücülər vasitəsilə yeni nəsil "AirPods" qulaqlıqları istifadəçinin ürək ritmlərini və onun bədən temperaturunu təyin edə biləcək.

Təbii ki, patentdə əks olunmuş özəlliklərin naqilsiz qulaqlığa inteqrasiya olunması üçün "Apple" şirkətinə bir neçə il vaxt lazım ola bilər. Lakin buna baxmayaraq, şirkət yeni nəsil "AirPods" üzərində aktiv şəkildə çalışır. Belə ki, bu qulaqlıqlar şirkətin ən çox satılan məhsullarından biridir.