Məişət texnikası

Məişət texnikası dedikdə ev daxilində işləri mexaniki və ya elektrik enerjisi hesabına yerinə yetirən cihazlar nəzərdə tutulur. Bu anlayışa təkcə iri ölçülü avadanlıqlar yox, həm də gündəlik xırda ehtiyacları qarşılayan cihazlar daxildir. Paltaryuyan, soyuducu, qabyuyan, kondisioner kimi avadanlıqlar artıq uzun illərdir ki, bir çox ev üçün standart hesab olunur. Digər tərəfdən tozsoran, mikser, elektrik çaydanı və oxşar cihazlar da bu kateqoriyanın ayrılmaz hissəsidir.
Bu cihazların əsas məqsədi insan əməyini azaltmaq və vaxt itkisinin qarşısını almaqdır. Bəzi hallarda məişət texnikası düzgün seçilmədikdə əlavə xərc, enerji itkisi və hətta istifadə çətinliyi yarada bilir. Buna görə mövzunu yalnız rahatlıq prizmasından yox, real ehtiyac və istifadə baxımından dəyərləndirmək daha doğru yanaşmadır.

Məişət texnikalarının növləri

Cihazlar adətən iri və kiçik məişət texnikası olmaqla, iki yerə bölünür. Əsas fərq onların ev daxilində tutduğu yer, istifadə tezliyi və ritmə təsir səviyyəsi ilə bağlıdır. Birinci qrup uzunmüddətli planlama tələb edir. ikinci qrup isə daha çox praktik ehtiyaclara cavab verir.
İri məişət texnikası dedikdə evdə sabit şəkildə yerləşdirilən və adətən illərlə istifadə edilən cihazlar nəzərdə tutulur. Soyuducu, paltaryuyan, qabyuyan, soba, kondisioner və su qızdırıcıları bu kateqoriyaya daxildir. Kiçik mətbəxdə həcmli soyuducu həm hərəkəti məhdudlaşdıra, həm də istifadəni çətinləşdirə bilər. Eyni şəkildə güclü, amma yüksək enerji sərf edən paltaryuyan uzun müddətdə aylıq xərcləri hiss olunacaq dərəcədə artıra bilər.
Kiçik məişət texnikası daha çevik və gündəlik işləri sürətləndirməyə yönəlmiş cihazlardan ibarətdir. Tozsoran, ütü, blender, mikrodalğalı soba, elektrik çaydanı bu qrupa daxildir. Onlar adətən yer problemi yaratmır və daha rahat daşınır. Hər gün işləyən tozsoranla ayda bir neçə dəfə istifadə olunan mətbəx cihazı üçün eyni keyfiyyət və davamlılıq tələbləri qoymaq doğru olmaz. Bəzən funksiyası az, amma sadə və etibarlı model real ehtiyacı daha düzgün qarşılayır.

Məişət texnikalarının qiyməti

Qiymət formalaşmasına marka tanınmışlığı, texniki göstəricilər, material keyfiyyəti və əlavə funksiyalar daxildir. Lakin qiymətin yüksək olması həmişə uzunömürlü və problemsiz istifadə demək deyil. Bəzi modellərdə əlavə proqramlar mövcuddur. Amma real istifadə zamanı bu proqramlardan nadir hallarda yararlanılır. Bu halda istifadəçi faktiki olaraq istifadə etmədiyi xüsusiyyətlər üçün əlavə ödəniş etmiş olur. Çox sadə modellər də müəyyən ehtiyacları qarşılamaya bilər. Qiymətlə imkanlar arasında tarazlıq tapmaq əsas məqsəd olmalıdır.

Seçim zamanı diqqət edilməli əsas məqamlar

Eyni cihaz iki fərqli evdə tamamilə fərqli nəticə verə bilər. Daimi yemək bişirilən mətbəxlə, nadir istifadə olunan mətbəx üçün eyni avadanlıq uyğun olmaya bilər. İstehsalçı tövsiyələri ilə yanaşı, şəxsi vərdişlər də nəzərə alınmalıdır. Enerji sinfi məsələsi çox vaxt ikinci plana atılır. Halbuki bu göstərici illik xərclərə birbaşa təsir edir. Ucuz alınan, çox enerji sərf edən cihaz uzun müddətdə daha baha başa gələ bilər. Bu məqam iri məişət texnikasında özünü göstərir. Məişət texnikası hər nə qədər rahatlıq yaratsa da, müəyyən risklər də mövcuddur. Elektron komponentlərin çoxluğu cihazları gərginlik dəyişmələrinə həssas edir. Bəzi modellərdə ehtiyat hissələrinin tapılması çətin olur. Tələsik verilən qərarlar adətən sonradan əlavə xərclərə səbəb olur. Xüsusilə kampaniya və endirim dövrlərində diqqət yayına bilir. Bu hallarda əsas ehtiyacdan kənar xüsusiyyətlər ön plana çıxır.