Mercedes-AMG bölümü S65 sedanının "vida" versiyasını buraxacaq
V12 mühərriki ilə təchiz edilmiş AMG modellərinin erası sona çatır – "bərkgedən" Mercedes’ləri istehsal edən bölmə bu mühərrikdən imtina etmək qərarını qəbul edib. İndiki M279 biturbomühərriki 2012-ci ildə debüt etsə də, onun kökləri səksəninci illərə dayanır: paylanan çiləmə, hər silindr başlığına bir paylaşdırıcı val və hər silindrə üç klapan.
AMG modellərində istifadə edilən bu mühərrik 630 at qüvvəsi və 1000 Nm hasil edir. Bu mühərriki Mercedes-AMG G 65 ofrouderinin, istehsalına son verilmiş Mercedes-AMG SL 65 rodsterinin və Mercedes-AMG S 65 sedanının kapotu altında görmək olar. Elə bu mühərriklə vidalaşmaq üçün, AMG bölməsi sonuncu modelin final versiyasını hazırlayıb.
Mercedes-AMG S 65 Final Edition modeli xüsusi tərtibata malik olacaqdır. Kuzov yalnız qara rəngdə ola bilər. Bu rəngə buraxılış sisteminin çıxış boruları da boyanıb. 20-düymlük təkər diskləri, bamperdəki və kandarlardakı işləmələr isə bürünc rəngindədir. Avtomobilin arxa dayaqlarında AMG loqotipləri yerləşdirilib. Salonda karbondan dekor elementlərini, mis rəngində tikişləri görmək olar. Salonun kontur işıqlandırması da standart olaraq bu çalara malikdir, lakin avtomobilin sahibi nəişıqlandırmanın rəngini dəyişmək imkanı da verilib.
Modelin daha bir maraqlı cəhəti mühərrikin qara rəngli qapağıdır. Xatırladaq ki, AMG modellərində bu qapaq gümüşü rəngdə olur. Mercedes-AMG S 65 Final Edition modeli tam opsiyalar dəstinə malikdir: buraya arxa fərdi oturacaqlar, panoram dam və maksimal sürəti 300 km/saat həddinə çəkməyə imkan verən AMG Driver’s Package də daxildir. Cəmi 130 ədəd "vida" sedanı buarxılacaqdır.
Bununla belə, AMG bölməsi V12 mühərrikinin buraxılmasına davam edəcəkdir. Bu mühərriklər Maybach subbrendi üçün istifadə olunacaqdır. Hazırda daha "sakit" tənzimləmələrə malik olan mühərriklər Mercedes-Maybach S 650 və Pullman modelində quraşdırılır. Bu mühərrikin 530 at qüvvəli baza versiyası isə Mercedes-Benz S 600 L modelinə də quraşdırılır.
"Altı yüz" modellərinin sahibləri üçün kapotun altında V12 mühərrikinin olması presij məsələsidir. AMG leyblını daşıyan avtomobillərdə isə ön plana tremperament çıxır. AMG bölümünün rəhbəri Tobias Moers "bərkdgedən" avtomobillərdə V12 mühərrikinin yeni konsepsiyaya malik olan aqreqatla təchiz ediləcəklərini bildirib. İlkin məlumata görə, bu V8 biturbomühərrikinin və elektromotorların əsasında yaradılmış hibrid güc qurğusu olamalıdır. Hibrid aqreqat AMG xətti üçün qənaətcilliyi və ekoloji təmizliyi təmin etməlidir.
