Sığorta ödənişini tez almağın sadə üsulu
Sığortalı sürücülər avtomobildə olan kamera və telefonları ödənişlə bağlı problemi aradan qaldıra bilər. Belə ki, qəza zamanı sürücü ziyan dəyən avtomobilinin foto və video görüntülərini çəkməsi sığorta hadisəsi ilə bağlı şübhələri aradan qaldırır.Sığorta şirkətlərindən fins.az-a verilən məlumata görə, bu vasitə xüsusilə də təhlükəsiz şəhər kameraları olmayan, qəza ilə bağlı sübut və şahidlərin olmadığı ərazilərdə həqiqi zərərçəkən sığortalıları müəyyən etməyə imkan verir.
Telefon və kamera çəkilişləri sığorta ödənişi probleminizi həll edə bilər
Sığorta eksperti İlkin İbrahimov fins.az-a bildirib ki, belə foto və video çəkilişlərə daha çox avtomobilin qəza yerindən götürüldüyü hallarda ehtiyac olur. Belə ki, bəzən avtomobil qəza yerindən götürüldüyü üçün qəzanın sığorta hadisəsi və ya dələduzluq halı olduğunu müəyyən etmək çətin olur. Şübhələri aradan qaldırmaq istəyən sığortalı sürücü avtomobili qəza baş verən ərazidən götürülməmişdən öncə hadisəni öz telefonu ilə çəkməlidir. Bundan əlavə avtomobildə quraşdırılan kamera qəzanı lentə alıbsa, bu da sübut kimi istifadə oluna bilər.Sürücünün sığorta şirkətinə təqdim etdiyi görüntülərlə verdiyi ifadə üst-üstə düşürsə, bu zaman avtomobilə dəyən ziyanla bağlı sığorta ödənişi verilir.
"Qəzanı telefonu ilə çəkən 20 müştərinin avtomobilini təmir etmişik"
Bu zaman aldadılmadığına görə həm sığorta şirkəti rahat olur, həm də sığortalı vaxtında ödəniş ala bilir. Məsələn, İlkin İbrahimov deyir ki, bu il ərzində avtomobil qəzaları ilə bağlı sürücünün telefon və kamera vasitəsilə çəkdiyi görüntüləri təqdim etdiyinə görə 20 hadisə üzrə sığorta ödənişi verilib. O bildirib ki, avtomobillərin qəza yerindən götürülməsi halları daha çox Bakı-Ələt yolunda və Müşfiq postu ərazisində baş verir. Bu qəzaları araşdırımaq üçün telefon və kamera görüntülərinə ehtiyac olur.
"Telefonlar dələduzları həqiqi zərərçəkənlərdən ayırmağa imkan verir"
Sığorta eksperti bildirir ki, avtomobilinə ziyan dəyən sürücü ilə sığortadan pul qoparmaq istəyənlər dərhal seçilir.Belə ki, zərərçəkən sığortalı adətən 1 gün ərzində qəza barədə sığorta şirkətinə müraciət edir.Çünki vətəndaş ona dəyən ziyanın dərhal ödənilməsində maraqlıdır. Sığorta dələduzluğu etmək istəyənlər isə real qəza ilə bağlı izi itirmək üçün 3-5 gün və ya daha gec məlumat verirlər. Bundan əlavə 1-3 min manat arasında ziyan dəyən qəzalar reallığa daha çox uyğun olduğu üçün şübhə doğurmur.Lakin avtomobilin hadisə yerindən götürüldüyü iri məbləğli qəzalar zamanı sığorta dələduzluğu halı olmadığını sübut etmək lazım olur. Belə hallarda isə telefon və kamera görüntülərinə daha çox ehtiyac olur.
