Paltaryuyan

Bir vaxtlar insanlar paltarları əl ilə yuyur, saatlarla suyun başında qalırdı. İndi isə bir düymə ilə bu iş həll olunur. Çox vaxt paltaryuyan alarkən yalnız qiymətinə və görünüşünə baxırıq. Sonra evə gətiririk və illərlə eyni qaydada istifadə edirik. Halbuki yanlış seçim və səhv istifadə həm paltaryuyanı tez sıradan çıxara bilər, həm də paltarların keyfiyyətinə zərər verə bilər. Bir gün səs çıxarır, bir gün suyu boşaltmır, bir gün də qoxu verməyə başlayır.
Hansı növ paltaryuyan kimlər üçün uyğundur, neçə kilo seçmək daha məntiqlidir, hansı proqram nə üçün istifadə olunur, necə baxım etsək uzunömürlü olar kimi suallar hər kəs üçün vacibdir. Çünki bu cihaz bir dəfə alınır və uzun müddət evdə qalır.

Paltaryuyan növləri

Paltaryuyan seçərkən ilk bilməli olduğun şey odur ki, bütün modellər eyni məqsədə xidmət etsə də, istifadə rahatlığı və yerləşdirilmə forması fərqlidir. Yəni seçim təkcə qiymətə görə yox, evinin ölçüsünə və gündəlik vərdişlərinə görə edilməlidir.
Ön yükləməli paltaryuyanların qapısı öndən açılır və üst hissəsi düz olur. Bu da onu mətbəxdə və ya hamamda rahat yerləşdirməyə imkan verir. Üstünə səbət qoymaq və ya şkaf altına yerləşdirmək mümkündür. Su və elektrik sərfiyyatı adətən daha qənaətcil olur. Amma dar məkanda qapının önə açılması hərəkəti çətinləşdirə bilər.
Üst yükləməli paltaryuyanlar yuxarıdan açılır. Bel əyilmədən paltar atmaq rahatdır. Xüsusilə yaşlı insanlar üçün daha komfortlu sayılır. Kiçik məkanda yaxşı seçim ola bilər. Çünki önə doğru yer tələb etmir. Quraşdırılan modellər mebelin içində gizlədilir. Çətbəx və ya hamamda ümumi görüntünü pozmur. Dizayn baxımından səliqəli görünür. Burada ən vacib məsələ ölçünün tam uyğun gəlməsidir. Bir neçə santimetr fərq belə sonradan problem yarada bilər.
Qurutmalı paltaryuyanlar həm yuyur, həm də qurudur. Paltarı asmağa vaxtı olmayanlar üçün böyük rahatlıqdır. Xüsusilə kiçik evlərdə və balkonu olmayan mənzillərdə işə yarayır. Amma enerji sərfiyyatı adi modellərə görə daha çox ola bilər. Həm də bütün parçalar qurudulmaya uyğun deyil.

Tutum və ölçü seçimi

Kilo göstəricisi yalnız pambıq paltar üçün nəzərdə tutulur. Real həyatda yuyulan geyimlərin hamısı eyni çəki və həcmdə olmur. Nazik köynəklə qalın yorğan eyni cür yer tutmur. Ona görə seçim edərkən yalnız kilo göstəricisinə yox, evdə nə qədər və hansı tip paltar yuyulduğuna baxmaq lazımdır. 5 kilo adətən tək yaşayan və ya iki nəfərlik ev üçün yetərli olur. Çox yığmadan, tez-tez yumağa imkan verir.
7 kilo orta ailələr üçün daha rahat seçimdir. Həm gündəlik paltar, həm də yataq dəsti kimi iri şeyləri problemsiz yumaq olur.
9 kilo və daha yuxarı ölçü isə uşaqlı ailələr və böyük həcmli paltarlar üçün uyğundur. Amma az paltar yuyan biri üçün çox böyük baraban səmərəsiz işləyir. Boşuna su və elektrik sərf olunur.

Paltaryuyan satışı və qiymətləri

Unvan.Az saytında paltaryuyan satışı və qiymətlərinə baxanda əsas məqsəd çox modelə baxmaq yox, özünə uyğun olanı tez tapmaqdır. Əks halda onlarla fərqli model arasında qalmaq və nə axtardığını unutmaq çox asandır. Əvvəlcə tutumu seçmək lazımdır. Sonra ölçünü müəyyənləşdirirsən ki, evində hara yerləşəcəyini biləsən. Daha sonra isə sənə doğrudan lazım olan funksiyaları seçirsən. Belə etdikdə qarşına yüzlərlə variant yox, bir neçə real seçim çıxır. Bu da müqayisəni asanlaşdırır və başını qarışdırmır.
İki paltaryuyanın qiyməti fərqli ola bilər və bu normaldır. Fərq adətən rahatlıq, səssizlik, proqram sayı və ümumi keyfiyyətlə bağlı olur.

Texniki baxım və uzunömürlü istifadə üçün nə etməliyik?

Sadəcə davamlı və diqqətli olmaq kifayətdir. Filtr çirkli suyun rahat çıxması üçün vacib hissədir. Vaxtaşırı açılıb təmizlənməsə, su gec boşalar və cihaz zorlanar. Rezin manjet isə qapının ətrafında yığılan su və kir səbəbilə qoxu verə bilər. Sadəcə nəm parça ilə silmək belə kifayət edir. Bu kiçik işlər sonradan böyük problem yaşamağın qarşısını alır.
Yuma bitəndən sonra qapını tam bağlamaq daxildə rütubət saxlayır. Bir az açıq qalması içəridə quruluq yaradır və pis qoxunun qarşısını alır. Həm də zamanla yaranan kif problemi azalır. Bu vərdiş cəmi bir neçə saniyə vaxt aparır. Amma təsiri böyükdür. Paltaryuyan hər dəfə səs çıxaranda və ya qəribə hərəkət edəndə dərhal qorxmağa ehtiyac yoxdur. Çox vaxt səbəb sadə olur. Evdə yoxlanıla bilən şeylərdən qaynaqlanır. Əgər su boşalmırsa, ilk baxılmalı yer filtrdir. Orada yığılan xırda əşyalar suyun çıxmasına mane ola bilər.
Səs birdən artıbsa, barabanda yad əşya qalması ehtimalı var.