Atletlər ikimərtəbəli qatara minəsi olmadı
Azərbaycanın İsveçrədən aldığı "KİSS" markalı, ikimərtəbəli elektrik qatarlarının 1-ci Avropa Oyunları zamanı Bakı sərnişin stansiyası ilə metronun "Koroğlu" stansiyası arasında işləyəcəyi planlaşdırılsa da, bu, baş tutmayıb.
Unvan.az Fins.az-a istinadən xəbər verir ki, yeni qatarlar ölkəyə gətirilən gündən Bakı Dəmir Yolu Vağzalında saxlanılır. Yalnız arada bir dəfə onlar sürətinin yoxlanması məqsədi ilə Kürdəmir rayonuna hərəkət edərək geri qayıdıblar.
Fins.az-a açıqlama verən Nəqliyyat Nazirliyi yanında "Azərbaycan Dəmir Yolları" QSC-nin Mətbuat katibliyinin rəhbəri Nadir Əzməmmədov isə bildirib ki, qatarların sözügedən marşrut üzrə hərəkəti Bakı 2015 Avropa Oyunları Əməliyyat Komitəsinin istəyindən asılıdır. Yəni, söhbət ilk növbədə atletlərin Bakı Olimpiya Stadionundan şəhərin mərkəzinə daşınmasından getdiyi üçün bu məsələdə Komitənin qərarı nəzərə alınır. Komitədən isə qatarların hərəkətinə ehtiyac olmadığı bildirilib.
