ABŞ-da sosial şəbəkə istifadəçiləri kimlərdir?
ABŞ-da sosial şəbəkə istifadəçilərinin demoqrafik təhlilini aparan "BI Intelligence" analitik şirkəti açıqlamalarını elan edib.
Araşdırmalardan əldə olunan nəticələrə görə, "Instagram" 2014-cü ilin yekunları üzrə ABŞ yeniyetmələri arasında daha çox istifadə edilən sosial şəbəkə olub. Onların 32 faizi məhz bu şəbəkəni əsas şəbəkə adlandırıb, 16 faizi "Facebook" sosial şəbəkəsinə üstünlük verib.
"Pinterest" şəbəkəsi daha çox qadınları əhatə edir. Belə ki, Amerika qadınlarının 42 faizinin internete çıxış imkanlarını məhz bu sayt təşkil edir. Kişilərin isə saytdan istifadə göstəriciləri 13 faizə bərabərdir.
"comScore" şirkətinin məlumatına görə, "Snapchat", "Vine" və "Tumblr" şəbəkələrinin istifadəçiləri daha çox gənclərdən ibarətdir. "Snapchat" şəbəkəsində istifadəçilərin 45 faizini 18-24 yaşlılar təşkil edir, "Vine" və "Tumblr" şəbəkələrində bu nəslin nümayəndələri isə 28 faizə bərabərdir.
"LinkedIn" daha çox yaxşı təhsil almış və maddi vəziyyəti qənaətbəxş olan amerikalılar arasında populyardır. Bu şəbəkədə illik gəliri 75 min dollardan çox olan amerikalıların 75 faizi qeydiyyatdan keçib.
İstifadəçi sayına görə auditoriyası hamdan çox olan "Facebook"da yaşlı nəslin nümayəndələri tərəfindən son dövrlərdə artım müşahidə olunub. Tədqiqatçılar bu vəziyyətin "Twitter", "LinkedIn" və "Pinterest" kimi sosial şəbəkələrdə də olduğunu qeyd ediblər.
