Daşınmaz əmlak bazarında ucuzlaşma gözlənilir
Son dövrlərdə iqtisadi vəziyyətlə əlaqədar olaraq, ölkədə mənzillərə tələbat azalıb. həmçinin manatın devalyasiyası ilə əlaqədar olaraq daşınmaz əmlak bazarında yaranmış qeyri-müəyyənlik qiymətlərin qısamüddətli artımına səbəb olub. lakin hazırda vəziyyətin stabilləşməsi ilə bağlı daşınmaz əmlak bazarında da qiymətlərin tənzimlənəcəyini proqnozlaşdılır. Ekspertlərin fikrinə əsasən ilin sonunadək Bakıda daşınmaz əmlak 10-15 faiz ucuzlaşacaq
"Koneko" qiymətləndirmə şirkətinin baş mütəxəssisi Vüqar Oruc bildirib ki, ilin sonunadək paytaxtda daşınmaz əmlakin qiymətində azalma müşahidə olunacaq. Qiymətlərin 2010-2011-ci illərdəki səviyyəyə düşəcəyinin qeyri-mümkün olduğunu bildirən ekspert, qiymət azalmasının Bakının bəzi rayonlarına aid olmayacağını da bildirib. "Həzi Aslanov" və "Əhmədli" metro stansiyaları və Xırdalan kimi rayonlarda ucuzlaşma gözlənilməsə də, mərkəz ərazidə qiymətlər enəcək. Ekspert sözlərinə görə, qiymət azalması tələbata uyğun olaraq dəyişir. Əgər tələbat azdırsa, qiymətlər də müvafiq olaraq enir.
Daşınmaz əmlakın qiyməti sentyabradək azalacağını bildirən "Veto Consulting"in eksperti Mahir Faadov hesab edir ki, ilin sonuna isə cüzi artım mümkündür. onun sözlərinə görə, daşınmaz əmlak bazarında qiymətlər hər ay azalır və haradasa sentyabradək bu azalma davam edəcək. Payızda mənzilin qiyməti cüzi arta bilər. Bu onunla əlaqədardır ki, yayda bu bazarda aktivlik azdır, adətən, daşınmaz əmlak obyektlərinin satışı avqustun sonu - sentyabrın əvvəlində fəallaşır. Əgər bu il bazarda ciddi dəyişiklik olmasa, ilin sonunadək qiymət artımı olmayacaq.
Mahir Faadov, ilin sonunadək mənzillərin qiyməti 5-10 faiz azala biləcəyini ehtimal edir. O, qiymət azalmasına bir çox amillərin təsir etdiyini bildirib: "Hazırda daşınmaz əmlakın qiymətləri əhalinin alıcılıq qabiliyyətini üstələyir ki, bu da tələbata təsir edir. Digər amillər də var, məsələn, bəzi banklar ipoteka kreditlərinin verilməsini dayandırıb. Söhbət dövlət xətti ilə verilən ipotekadan deyil, bankların öz proqramlarından gedir. Rusiyada yaşayan azərbaycanlılar da adətən ilin sonuna yaxın qohumlarına mənzil almaq üçün pul göndərirdilər, hazırda isə Rusiyadan pul göndərişləri azalıb. Bütün bu faktorlar da tələbatın azalmasına və müvafiq olaraq, daşınmaz əmlakın qiymətlərinin düşməsinə təsir edir".
