Təkrar yaşayış mənzillərində qiymətlər ucuzlaşıb
Əhalinin alıcılıq qabiliyyətinin zəifləməsi ilə əlaqədar olaraq, təkrar yaşayış mənzil bazarında qiymət azalması müşahidə olunub.
"MBA Consulting Group" konsaltinq şirkətinin direktoru Nüsrət İbrahimov Bakıda köhnə mənzillərin yeni qiymətləri haqqında açıqlama verib. Onun məlumatlarına görə, 2015-ci ilin may ayında təkrar yaşayış mənzil bazarında satışa təklif olunan yaşayış mənzillərinin hesablanmış orta təklif qiyməti 1689 $/кv.m-dən -3.49% azalaraq 1630 $/кv.m-ə qədər, milli valyuta ilə isə ay ərzində 1770 AZN/кv.m-dən -3.47% azalaraq 1709 AZN/кv.m həcmində qərarlaşıb.
Mütəxəssisin sözlərinə görə, may ayında bazarın bu seqmenti üzrə təklif həcmi -9.4% azalıb. Aprel ayında ümumi təkliflərin sayı 1726 olduğu halda, bu rəqəm may ayında 1564 təşkil edib.Təkrar mənzil bazarında qeydə alınan ümumi təkliflərin sayı ötən ilin müvafiq ayı ilə müqayisədə isə -25.0% azalıb. Nəsimi, Nərimanov və Yasamal rayonlarının təklif portfelindəki payı mütləq çoxluq təşkil edib və onların ümumi payı 55.3 %-ə bərabər olub.
5 otaqlı mənzillərə alıcıların tələbatının azaldığını bildirən şirkətin direktoru, 1 və 3 otaqlı mənzillərdə də tədricən eyni vəziyyətin olduğunu qeyd edib.
"2 və 4 otaqlı mənzillərin təklif üzrə payında isə artım müşahidə olunub. Təkliflə yanaşı otaqlar üzrə qiymət azalması 2 otaqlı mənzillərdən başqa digər müxtəlif otaqlı mənzillərdə baş verib"-deyə, N. İbrahimov deyib.
