Ev almaq istəyənlər bu xəbəri oxusun
Azərbaycanda getdikcə valyuta bazarında dolların, əmlak bazarında isə mənzillərin qiymətləri ucuzlaşır.
Unvan.az xəbər verir ki, Bu prosesin nə zamana qədər davam edəcəyi ilə bağlı hafta.az-a açıqlamasında iqtisadçı ekspert Vüqar Bayramov danışıb. Ekspert bildirib ki, hazırda baş verən ucuzlaşma payız aylarına qədər davam edəcək:
"Hələ ki, dolların kəskin ucuzlaşması müşahidə olunmur. Manatın dollara nisbətdə məzənnəsi, dolların avroya nisbətdə məzənnəsinə uyğun olaraq dəyişir. Son günlər avronun məzənnəsində artım müşahidə olunduğu üçün, bu manatın dollara nisbətən möhkəmlənməsinə səbəb olub. Bu da özünü iyun ayında manatın məzənnəsinin möhkəmlənməsində göstərir. Mənzil bazarındakı qiymət azalmaları valyuta məzənnəsindəki dəyişikliklərlə bağlı deyil. Əslində bazarda 2014-cü ilin avqust ayından başlayaraq qiymətlərin aşağı düşməsi müşahidə olunmaqdadır. 2015-ci ildə bu azalmalar daha da intensivləşib".
Ekspert bildirib ki, mənzil bazarındakı azalmaların Azərbaycan iqtisadiyyatına ciddi təsiri yoxdur:
"Əslində iqtisadi baxımdan Azərbaycan iqtisadiyyatı üçün mənzil bazarındakı qiymətlərin aşağı düşməsi arzuolunandır. Çünki qiymətlər aşağı düşərsə praktik olaraq bazarda dövriyyənin genişlənməsinə nail olmağa şərait yaranar. Eyni zamanda bu imkan verir ki, orta təbəqə mənzil bazarındakı mövcud qiymətlərdən istifadə edərək, öz problemini həll etsin. Mənzillərin qiymətinin aşağı düşməsi birmənalı şəkildə Azərbaycan iqtisadiyyatı üçün əlverişlidir".
Vüqar Bayramov ev almağı düşünənlər üçün də iqtisadi proqnozunu verib:
"Bizim araşdırmamız göstərir ki, mənzil bazarındakı qiymət azalmaları bu ilin payızına qədər davam edəcək. Payız aylarında isə qlobal şərtlərdən, neftin qiyməti, Rusiya iqtisadiyyatındakı mövcud vəziyyətdən asılı olaraq dəyişiklik olarasa qiymət artımı istisna edilmir. Lakin hazırkı şəraitə uyğun olaraq, payıza qədər qiymətlərin aşağı düşəcəyi gözlənilir".
