İnşaat şirkətlərinin SAXTAKARLIQ YOLLARI

Son günlər inşaatla məşğul olan şirkətlərin vətəndaşları aldatması nəticəsində xeyli sayda insan vicdanlı alıcı olduğu təqdirdə, maddi dəyərini öncədən ödədiyi mənzilinə sahib ola bilmir. Əvəzində isə vətəndaşın yolu, məhkəmədən və digər müxtəlif orqanlardan keçməli olur.

Mənzil alarkən aldanmamaq üçün nə etmək lazımdır?

İqtisadçı ekspert Natiq Cəfərli hafta.az-a açıqlamasında bu barədə danışıb. O bildirib ki, hazırda insanlar bu sahədə maarifləndirilmədiyi üçün əksər hallarda aldanırlar:

"Son illərdə bir sıra inşaat şirkətlərinin məsul şəxslərinin söylənilən faktlarla bağlı həbs ediməsinə baxmayaraq, bu problem hələ də öz aktuallığını qoruyur. Problemin həlli istiqamətində əsas işlərdən biri vahid reystr xidmətinin yaradılması idi ki, bu da artıq yaradılıb. Sadəcə, insanlar bilgisiz olduğu üçün bəzi işbazlar bundan istifadə edirlər. Nəticədə isə bir mənzil bir neçə adama satılır və böyük problemlər ortaya çıxır. Digər problem isə ondan ibarətdir ki, yeni tikilən binalarda mənzillərin tikildikdən sonra deyil, öncə satışı həyata keçirilir. Bir çox ölkələrdə bu belədir ki, mənzil tikildikdən sonra dövlət komissiyası tərəfindən qəbul edilib, satışı həyata keçirilir. Bina sahibinə, tikinti aparan şirkətə və vətəndaşa Niyyət müqaviləsinin bağlanması haqqında icazə verilir. Azərbaycanda isə söylədiyim kimi belə bir təcrübə yoxdur. Bu səbəbdən bəzən tikinti aparan şirkətlər hətta bina tikilən zaman belə mənzilləri müqavilələr vasitəsilə satırlar. Müqavilənin isə bir neçə nəfərlə bağlanması nəticəsində bu kimi problemlər yaranır".

Ekspert bildirib ki, yaşanan problemləri aradan qaldırmaq üçün mövcud qaydalarda yeni dəyişikliklər etmək lazımdır:

"Registr məsələsini tam inkişaf etdirmək lazımdır. Eyni zamanda, görülən işlər barəsində vətəndaşlar məlumatlandırılmalıdır. Bizdə belədir ki, bina tikən şirkətlər hətta tikilinin fundamenti qoyulandan sonra satışı həyata keçirirlər. Burada məntiq də yoxdur. Vətəndaş düşünməlidir ki, bəlkə heç Dövlət Komissiyası bunu qəbul edə bilməyəcək. Müəyyən qüsurlar ola bilər ki, komissiya buna görə şirkətə təzyiqlər edə bilər. Beləliklə də tikilən mənzillərin satışı yubanar. Bu baxımdan vətəndaş mənzil almamışdan öncə məlumat toplamalıdır. Dövlətin üzərinə düşən məsələ isə odur ki, yeni tikilən binalar daha tez qeydiyyata alınmalıdır. Çünki prosesin uzanması da bu kimi problemlərin yaranmasına yol aça bilir".