Kvadratı 1000 dollar civarından enməyən "ucuz" mənzillər
May ayında təkrar mənzil bazarında ucuzlaşma olsa da, bunu ilkin daşınmaz əmlaklara aid edə bilmərik. "MBA Ltd" qiymətləndirmə və konsaltinq şirkətinin məlumatına görə, belə mənzillər 3.7 faiz bahalaşıb. Belə ki, ötən ay "pod moyak" yaşayış mənzillərinin hesablanmış orta təklif qiyməti 1066 dollar/kv.m-dən 3.75 faiz artaraq 1106 dollar/kv.m-ə qədər, milli valyuta ilə isə ay ərzində 1117 AZN/kv.m-dən artaraq 1159 AZN/kv.m bəndində qərarlaşıb.
İlkin yaşayış mənzil bazarında təklif edilən mənzillərin əksər hissəsini 1000 dollar/kv.m-ə qədər olan ucuz mənzillər təşkil edir - ümumi portfelin 52.6 faizi. Ümumi təklif portfelinin qalan 9.9 faizini isə qiyməti 1600 dollar/kv.m-dən yuxarı olan bahalı mənzillərdir, burada qeydə alınan orta qiymət isə 2145 dollar/kv.m-dir.
Hesabat ayı üzrə təklif portfelində satışa çıxarılan "pod moyak" mənzillərin sayında Nəsimi, Xətai və Yasamal rayonlarının payı mütləq çoxluq təşkil edir və bu 3 rayonun ümumi təklif portfelindəki payı birlikdə 63.9 faizə bərabərdir.
İlkin yaşayış mənzil bazarında kvadrat metrin qiymətinə görə təklif olunan ən bahalı mənzil 5 otaqlı təmirsiz mənzildə qeydə alınıb. Səbail rayonunda, "Sahil" metrostansiyası yaxınlığında yerləşən 265 kv.m sahəyə malik olan, tam təmirsiz mənzilin kvadrat metrinin satışa təklif olunan qiyməti 3200 dollar təşkil edib. Ən ucuz mənzil isə ötən aprel ayında da olduğu kimi, Masazır qəsəbəsində qeydə alınıb. Burada ümumi sahəsi 53 kv.m olan yeni tikili, 1 otaqlı mənzilin qiyməti 400 dollar/kv.m. olub. Hər növ mənzillərin sayında artım qeydə alınıb. Əlbəttə, ən böyük üstünlük 2 otaqlılardadır.
Rayonlar üzrə orta bazar qiymətləri aşağıdakı kimi formalaşıb:
Abşeronda 1 kv.m 630 dollar
Binəqədidə 1 kv.m 1019 dollar
Nərimanovda 1 kv.m 1205 dollar
Nəsimidə 1 kv.m 1268 dollar
Nizami 1 kv.m 946 dollar
Qaradağ 1 kv.m 590 dollar
Sabunçu 1 kv.m 700 dollar
Səbail 1 kv.m 2011 dollar
Suraxanı 1 kv.m 802 dollar
Xətaidə 1 kv.m 1102 dollar
Yasamalda 1 kv.m 1050 dollar
Ay ərzində Nərimanov, Abşeron, Nəsimi və Xətai rayonlarında qiymət artımı (3.3 faiz, 2.3 faiz, 2.2 faiz və 3.3 faiz) qeydə alınıb. Mayda ən çox qiymət azalması isə Binəqədi, Nizami və Səbail rayonlarında (-8.2 faiz, -3.9 faiz və -4.1 faiz) olub. Maraqlı məqamlardan biri ötən ay hər otağın orta satış qiyməti 57,8 min dollar, mənzilin orta qiyməti isə 150,4 min dollar təşkil edib.
Ümumiyyətlə, ekspertlərin proqnozlarına görə, bu ilin sonuna kimi daşınmaz əmlak bazarında ucuzlaşma davam edəcək. Ümumilikdə, cari il üçün 15 faizlik ucuzlaşma gözlənilir.
Lakin daşınmaz əmlak bazarında aparılan təhlillərin heç də hamısı bu qənaətdə deyil. Bəzi analitiklər düşünür ki, mövcud şəraitdə əsas problem real alıcıların olmamasındadır. Bu həm devalvasiyadan qorxub gözləmə mövqeyinə çəkilənlərin, həm də Rusiyada baş verən problemlərdən əmlaka investisiya etməkdə tərəddüd edən həmvətənlərimizin təsiri ilə yaranmış durğunluqdur. Bu halda əmlak bazarında real qiymət dəyişikliyi ilə bağlı səsləndirilən proqnozlar yalnız və yalnız ajiotaj yaratmağa yönəlmiş addımlardır. Vəziyyət gözləmə mövqeyinin bazara təsiri altında baş verir və belə şəraitdə qiymət dinamikası adətən aldadıcı olur. Bütün bu kimi amilləri nəzərə alaraq qiymət enişinin baş verəcəyini düşünmək bir qədər tezdir.
