"KIA" avtomobilləri ucuzlaşdı
İyunun əvvəlindən Bakıda satılan 2014-cü il buraxılış "KİA" markalı minik avtomobillərinin qiymətinə endirim edilib.
Unvan.az xəbər verir ki, bu barədə fins.az-a "Kia Motors Azərbaycan" şirkətindən bildirilib. Endirimin məbləği 300 manatdan 6 min manata qədərdir.
Ən az endirim "Picanto" modelindədir. 12500 manat satılan avtomobil indi 12 200 manat təklif edilir. "Soul" 400 manat, "Cerato" 500 manat, "Optima" 600 manat, mexaniki transmissiyalı "Rio" və "Sportage" 1000 manat, "Carens" 1500 manat, dizel mühərrikli "Sorento" 3700 manat, "Cadenza" modeli isə 4200 manat manat ucuzlaşıb.
Ən çox endirim isə benzin mühərrikli "Sorento" modelinə tətbiq edilib. 6 min manat ucuzlaşan Sorento 28 800 manata satılır.
Şirkətin brend meneceri Zəka Əlibəyov bildirib ki, 2014-cü il modellərindən yalnız avtomot sürət qutulu "KİA RİO" modelinə endirim tətbiq edilmir. Endirim kampaniyası ayın sonuna kimi davam edəcək.
"Hər yay köhnə modelləri ucuz satırıq"
Z.Əlibəyovun sözlərinə görə, təmsil etdiyi şirkət bu cür endirimi hər il yay mövsümündə tətbiq edir. O, ötən illə müqayisədə satışların kəskin olmasa da, azaldığını deyib. Səbəb son vaxtlar Azərbaycan banklarının kreditləşməni məhdudlaşdırmasıdır: "Kreditlər normal verilsə, avtomobil bazarı canlanacaq".
