Turistlərin gəlişi Bakıda kirayə evləri bahalaşdırdı
"Birinci Avropa Oyunlarının ölkəmizdə keçirilməsi ilə bağlı olaraq paytaxtın bir və ikinci zonalarındakı kirayə bazarında tələb yüksəlib".
Unvan.az xəbər verir ki, bu haqda iqtisadçı ekspert Vüqar Bayramov açıqlama verib. O, iyunun ilk yarısında kirayə mənzil bazarında qısa müddətə təklif edilən evlərin qiymətində artım müşahidə edildiyini bildirib:
"Apardığımız monitorinqin nəticələrinə görə, I Avropa Oyunlarının ölkəmizdə keçirilməsi ilə bağlı paytaxtın bir və ikinci zonalarındakı kirayə bazarında tələb yüksəlib. Qiymət artımları da məhz qısa müddətli dövrdə, xüsusən də 1 ay müddətinədək təklif edilən kirayə evlərdə müşahidə edilib. Belə ki, oyunları izləmək üçün ölkəmizə gələn turistlərin bir qismi öz pullarına qənaət etmək və daha uzun müddət Azərbaycada qalmaq üçün hotellərdə deyil, evlərdə yaşamağa üstünlük veririlər. Eyni zamanda paytaxtda yerləşən hotellərin böyük əksəriyyəti 4 və ya 5 ulduzlu olduğu üçün təklif edilən qiymətlər yüksəkdir. Buna görə də turistlərin bir qismi evlərə üz tuturlar. Təəssüf ki, kirayə ev sahibləri, xüsusən də mənzil alğı-satqısı ilə məşğul olan ofislər süni şəkildə kirayə evlərinin qiymətini yüksəldiblər. Monitoriqlərimiz göstərir ki, şəhərin mərkəzində bəzi mənzillərin bir aylıq kirayə haqları hətta 3 min manatadək artırılıb.
Baxmayaraq ki, həmin mənzillər ötən ay 1000-1500 manata təklif edilirdi. Bu isə ölkəmizə gələn turistlərin sayının artmasından evlərin kirayə verilməsi ilə məşğul olanların süni şəkildə qazanc əldə etmək istəyi ilə bağlıdır".
