100 milyon dollarlıq daşınmaz əmlak dələduzluğu
ABŞ-ın Federal Ticarət Komissiyası (FTC) bu günə qədər ölkədə görülən ən böyük daşınmaz əmlak investisiya dələduzluğu hadisəsi ilə bağlı hərəkətə keçib.
Federal Ticarət Komissiyası (FTC) Vaşinqtonda keçirilən mətbuat konfransında, bir şirkətin, Mərkəzi Amerikada yerləşən Belize-də guya həyata keçiriləcək lüks yaşayış və istirahət mərkəzi layihəsi ilə mindən çox amerikalı investoru aldatdığını və 100 milyon dollarını mənimsədiyini açıqlayıb.
Amerikadakı Merilend Bölgə Məhkəməsində açılan cinayət işinə FTC-nin təqdim etdiyi sənədlərə görə, şirkət, Belize-də aralarında xəstəxana, otellər, qolf meydançaları, spa, qumarxana, mağazalar, kafelər və restoranların da olacağı lüks yaşayış və istirahət mərkəzi tikəcəklərini iddia edərək investorlardan pul toplayıb.
Komissiya, saxta layihədəki evlərin investorlara 150 min ilə 500 min dollar arasında satıldığını bildirib.
FTC-yə görə 10 ildən artıq bir müddət öncə başlayan layihə hələ də başa çatdırılmayıb. Manhattan böyüklüyündəki tikinti sahəsində cəmi 12 villanın inşası tamamlanıb.
"Wall Street Journal" qəzetinin xəbərinə görə, aradan keçən 10 il sonra investorlar narahat olmağa başlayıblar.
